Sertifikat Guru Penggerak, Kiwari Bakal Loba nu Ngudag!

 

Haturan pangwilujeng pikeun guru nu geus nyangking sertifikat guru penggerak, atawa keur dina proses “Pendidikan Guru Penggerak.” Sabab masih haneut keneh di tegeskeun dina Peraturan Mentri Pendidikan Kebudayaan Riset dan Teknologi  (Permendikbudristek) Nomer  40 taun 2021, titimangsana, 17 Desember 202,1 tentang Penugasan Guru sebagai Kepala Sekolah. Dina eta palaturan ditegeskeun,  guru nu boga karep ningkatkeun karir tina guru jadi Kepala Sekolah (Kepsek), kudu nyangking sertifikat guru penggerak.

Padahal mun nitenan alam pamikiran para guru penggerak, komo nu angkatan mimiti mah, (guru nu mariluan guru penggerak), jigana teu hir teu walahir, teu kapikir ti asalna, mikir-mikir hayang diangkat jadi  Kepala sekolah satutasna miluan  eta program.  Taya kacindekan ti awalna, prospek guru nu miluan program guru penggerak gujragna kana hiji jabatan “Kepala Sekolah (Kepsek).”  Euweuh rengkolna dina bewarana di “website” https://sekolah.penggerak.kemdikbud.go.id/  Apan pikeun guru nu ngariluan eta program ukur dibejeran dina tutulisan wungkul, yen nu marilun guru penggerak teh tujuan pikeun guru nu boga karep ningkatkeun daya kapamingpin dina ngajar ka siswa, karep silih sumangetan jeung papada guru dina ningkatkeun kamampuh kaguruan,  guru nu boga irongan pikeun ningkatkeun  kamaslahatan atikan. Saged tandang di posisi tukang, hareup, atawa di posisi  tengah, ngalatih diri ngadorong lahirna kawijakan ti handap ka luhur.  Taya sakecap oge netelakeun “Guru Penggerak bakal diangkat Kepala Sekolah.”

Guru-guru nu garabung teh loba nu golongan guru “liwar.” Nu dina gerak jeung jiwana teu pati resepeun kana gaya biasa-biasa. Boh dina ngajar, boh cara mikirna. Sakapeung sok dianggap marawa karep sorangan. Mancidal, beda ti batur. Matak pikeseleun batur.

Coba geura urang tengetan kacindekan tina eta palaturan teh kieu:

Pasaratan calon kepsek nya eta:

1.         lulusan S1 (sarjana), (teu dijelaskeun S1na teh kependidikan atawa laina dina eta palaturan);

2.         nyangking sertifikat pendidik,

3.         boga sertifikat guru penggerak,

4.         pangkat minimal golongan III/b,

5.         guru ahli pertama pikeun P3K,

6.         pangalaman manajerial di sakola/organisasi pendidikan atawa komunitas.

Mudah-mudahan ku lungsurna ieu palaturan, teu ngajadikeun eta jabatan strategis di sakola tetep jadi jabatan “horor” nu dipikasieun ku sabagian guru-guru. Tapi jadi trend munculna pamingpin-pamingpin di dunya atikan nu boga pamikiran yen “proyek hiji-hijina para pamingpin di dunya atikan, taya lian pikeun ningkatkeun budaya silih asih ku pangarti, silih asah ku pangabisa, silih asuh ku pangawetuh.”

Sabadana lumungsurna eta palaturan,  sertifikat guru penggerak  bakal pada ngudag, komo mun geus aya contona di hiji daerah, guru penggerak langsung diangkat jadi Kepala Sekolah.

 Pangwilujeng, kanggo sabalad-balad nu kiwari geus boga sertifikat guru penggerak, atawa keur miluan proses pendidikan guru penggerak.

(ti kuring: reueus ka maranehna).

Tiasa  di donot di handap pikeun nu peryogi Permendikbudristekna! Der ah Baraya!

https://drive.google.com/file/d/100frfEgq7SSI4vMzoy9XLNpOXTsHjkzW/view?usp=sharing